ايه رايك لو تعيش مجنون

جربت تعيش مجنون قبل كده ..تعالي نتخيل انك تعيش مجنون ..يوم من ايام الاسبوع اوله اخره انت حره بسالمهم تبئى مجنون في اى حاجة ..يعنى هتعمل ايه اقولك ..الغى مخك كده ..وانسى الايام والناس حوليك والزمن ..كبر دمااااغك اووووووى ..غمض عنيك وامشى في وسط الشارع ... واضحك بصوووووووت عالي ..اصرخ لو حاجة مضايقاك ..تعالي في وسط الشغل وقول تصبحوا علي خير ..وهات مخدة وكبرتاية واستغطى ولا يهمك يعنى هيحصل ايه لو جه المدير يصحيك ابئى اسالوا هى الساعة كام ..واقوم افطر معاه وابدا شغلك من الاول ..هات الجرايد واعمل بيها مراكب وشوف الشخصيات اللى مرسوم فيها هتقع منها ولا هتفضل موجودة ..وانت ماشى وقف واحد واحد قدامك وقوله انت كدبت كام مرة النهاردة .اكيد تلت تربعهم هيكدب ويقولك لا مش كدبت ..ابتسم وقوله ياااااااااكدااااااااب .وسيبه وامشى ...واركب اول اتوبيس يقابلك وانزل اى مكان وامشى وامشى واتفرج علي الناس بذهول مش انت مجنون يبئى لازم كده ..ممكن تروح في ميدان التحرير كده واقف عند تمثال عبد المنعم رياااااااض اواى تمثال وتقول يعنى مفيش حكومة انااااا الحكومة ..

اقولك روح كوبرى قصر النيل واطلع عند الاسد اللى تحبه واضربه بالقلم وانزل تانى اقوله متعملش كده تانى يا وحش وتقف تتفرج عليا وانا تحت ..

اجرى ورا المترو وقوله حاسب يا اسطى واشعبط في الباب وقول طيرى يا طايرة طيرى هههههههه ..جرب تلبس هدومك بالمشقلب اللى قدام وار واللى ورا قدام ..عادى وقول موضة..هتلاقى مصر كلها مقلداك ..امشى بضهرك وادى الدنيا قفااااااك ..وحاول تعيش الحياة بالشقلوب يمكن كده تتعدل ..اتكلم وقت ما الناس مش عايزة تسمعك ..واسكت وقت ما الناس تبئى مش عايزة تسمع غيرك

ممكن تروح لقصر الريس وتخبط وتدخل وتقول دستور يا اهل البيت بس بشويش

كده بئى يا حلو هيطلعك من غير روتين ولا بهدلة السجلات شهادتين شهادة جنان رسمى وشهادة وفاتك ..الله يرحمك يا باشا ..هاااااا تحب تعيش مجنون ولا عااااااااااقل .. انا بئى احب اقوم علشان دماغى سخنت شوية اروح اسمع اغنية

محمود العسيلى الدنيا مجنونة وهحاول اعيش مجنونة واجرب كده بس ياتري هاخد انى شهادة في الاخر ؟!!ا

تحياتى

بسمك نحياا

لسه فيكم خير يا ولاد

وانا ماشية مروحة زي كل يوم..لقيت بنت قلبوظة لبسه بادي وبنطلون جينز

منظرها العام ملفت لدرجه اني اندهشت وتنحت كده هو هههههه .ولقيت ثلاثه ولاد روشين وقفين ..علشان يعدوا ويركبوا الميكروباص

انا قولت ايه هيعملوا بالوا ويصفروا ويغلسوا علي البنت

فواحد منهم بص للبنت فصحابه قلوله انت بتبص عليها ليه ..وده اللي لفت نظري.وقولت في سري يا راجل هههههه .لان نادرا متلاقي اصحاب يعاتبه صحابهم انه بص علي بنت وكمان بصوت عالي بحماس كانه ارتكب جريمة ..لان عاده بيبئ في مشاركة جماعية ومسانده قلبيه في المواقف اللي زي دي هههههه

المهم رد صحابهم ..وقال ليهم متشوفوا هي عامله ايه في نفسها ..راحوا اصحابه اتنرفزوا وهاتك يا تهزىء في البنات وانا ماشيه وعمله عبدو العبيط ومليش دعوة بحاجة ..

سيبكم من التهزىء العام للبنات اللي علي راسه بطحه بئي هههه

المهم ان

لسه فيكم خير يا ولاد ههههه

ربنا يكتر من امثالكم

وارحمونا بئي يا بنات من عمايلكم

كانت معكم بسمك نحيااا من امام المكيروباص

انا والشغل

قومى يا بنتى الساعة سابعة قومى يلالالالالا هتتاخري ..يووه لسه يا ماما عايزة انام شوية ..يادتى النيلة ..وافضل ابرطم بكلام كده عبيط مش ضروري نقوله ههههههه .. كل يوم علي وش الصبح يحصل الموال ده بينى وبين ماما لدرجة انى ساعات بعيط علشان اقوم وانزل الشغل ..شغلي ده في المهندسين واحنا فين بئى في حتة بعيدة كده بعدين ابئى اقولكم عليها المهم بصحي بسرعة بعد الموشح بتاع كل يوم والبس جري واشرب اللبن واكل البيضة ..ولو اعترضت ..مش بخلص ..دى البيضة ديه مش عارف ايه وايه ..المهم باكلها في بؤى مرة واحدة ووراها اللبن وطيران علي الاوضة علشان ارتب نفسى والبس الجزمة واشبك الشنطة في ايدى والموباااايل اضربه في الشنطة ودرجن درجن علي السلالم هههههههههه ببئى كانى داخلة سباق خيل في الشارع ومصدق اوصل للموقف واركب جنب الشباك ورا علشان انسى انى متاخرة والناس اللى راكبة اللى بتبرق ديه هههههههههههههه وعلشان ملمش انا الاجورة مش ناقصة خناقات علي الصبح وساعات بشغل الموبايل واسمع نجوم اف ام واعيش بئى واول ما يقف الميكروباص اكمل سباق الخيل لغاية المحطة ومبشوفش قدامى طيران ياعم الحاج لغاية شباك التذاكر وبمجرد ما بوصل للماكنة واعدى كانى وصلت لطوق النجاه واجرى اجرى لغاية عربية الستات ومليش دعوة بئى اللى يتفرج يتفرج عليا وانا بجرى طب اعمل ايه ما انا متاخرة طظ فيهم ..المهم اركب وخلاص وساعات مش بلحق واركب عربية الغفر قصدى الرجالة ههههههه وافضل اطنط من عربية لعربية لغاية ما اوصل لعربية الستات وبلاحظ ان لو بنت ركبت عربية الرجالة مش بيسبوها تعدى لازم يتفرجوا عليها امال المهم لما اوصل بئى عربيةالستات كانى قاعدة فى خلية نحل زن زن زن زن يا خرابي ههههههههههه نفسى اقوم واقول فى نفس واحد اخرسوووووا بئى ..بس انا بمشى في الحالة ديه بس علي مثل حلو اوى الباب اللى يجيلك من الريح سدوا واستريح فبحط السماعات واشغل الاغاني واغمض عنيا لغاية ما اوصل محطة السادااات ومن هنا ببدا مرحلة تانية من رحلة شغلي اليومية ..هكملكم بعدين علشان انا تعبت من الجري ههههههههههههه

بسمك نحيااا

لحظة توهان وضياع

احيانا الواحد بيعدي بفترة ضياع او توهان يعني..يبئ ماشي مظبوط واخر تمام والدنيا وردي

فجأة توقف المركب في وسط البحر ويوقف صحبها تايه مش عارف يروح يمين ولا شمال

..ولاعارف يبدا منين ..مع انه كان راسم الطريق وعارفه بس ايه اللي حصل وايه اللي جري..ده اللي مش عارفه .. اتشل تفكيره ..ضاع في غربه ملهاش حدود مع ان حوليه كل البشر..شارد..وتايه مركبه مش لاقي مرسي..

لكن تيجي نسمة هوا تحرك شراع المركب ويأدف صحبها ويعافر وتمشي تاني المركب وهي عارفة علي فين هترسي

بنت البلد المصرية

..

قلبي وردة علي الطريق

قلبى وردة على الطريق قطفها حد مات غريق
خدها وراح لمكان بعيد وسابنى عايش مليش صديق
يتوه الكلام ننسى الالام قلبى راح ويا الغريق
انادى واقول يا قلبى فينك اسمع صدى بيقول غريق
الف بلاد وراها بلاد وادور علية مفيش طريق
تعبت توهت زهقت توبت احط حاجة على الطريق
اسرح واقول انا قلبى مات طب عايش ازاى ..؟ مفيش اجابة
دايما علطول ليلى اهات طب عايش ازاى ..؟ اهى دى الغرابة
مفيش جواب القلب غاب اة مالعذاب الناس ديابة
تاكل وتنهش فى لحم غيرها .. وغيرها فاكرها ناس غلابة
ابص واستغرب احس واتغرب واقول يا دنيا لية قلابة
لو تهدى وتقولى انا قلبى فينه والله هتنولى وسام الافادة
قلبى كان صاحبى وفرحة كان فرحى من يوم غيابة مفيش سعادة
قلبى كان ضلى كان هو اللى فاضلى قلبى دا عسل دا سكر زيادة
قلبى يا وردة مالبستان داريتك بعمرى من الاحزان
لكن الانسان ملوش امان خدك من ايدى وسابك حيران
قلبى يا وردة خليك قوى ولو انت سامع قول بالقوى
انا للنهار انا للنهار
هسمع انا واجى اخدك بالاحضان

امضاء سفير الحب

مـــجــــلة حـلــــمــنا

مجلة حلمـــنــا

عملناها بايدنا وقلبنا وبحلمنا
وافكارنا رسمناها وباقلامنا كتبناها
لو عايز تتابعها بجد تابعها على الرابط ده
وده اللينك اللى هيدخل على المجلة واعدادها

http://vb.masrya.com/forumdisplay.php?f=81

هو نزل منها العدد الاول والثانى ..يارب تعجبكم ..وعايزين
ارائكم وتعليقتكم تهمنا
ولو حد عايز يشترك معانا بموضوع اويساهم في نشر المشروع الصغير بتاعنا ويدعمنا فممكن يعلق هنا فى المدونة او

على ايميل المجلة
OURDREAM_MAGA@hotmail.com

كل سنة وانتوا طــــيبين بمناسبة مولد سيد الخلق

علـــــي اســـــــم مـــــــــصـــــر

على اسم مصر التاريخ يقدر يقول ما شاء

أنا مصر عندي أحب وأجمل الأشياء

باحبها وهي مالكه الأرض شرق وغرب

وباحبها وهي مرميه جريحة حرب

باحبها بعنف وبرقة وعلى استحياء

واكرهها وألعن أبوها بعشق زي الداء

واسيبها واطفش في درب وتبقى هي ف درب

وتلتفت تلقيني جنبها في الكرب

والنبض ينفض عروقي بألف نغمة وضرب

عـــلى اســــــم مصــــــــر

مصر النسيم في الليالي وبياعين الفل

ومرايه بهتانة ع القهوة .. أزورها .. واطل

القى النديم طل من مطرح منا طليت

والقاها برواز معلق عندنا في البيت

فيه القمر مصطفى كامل حبيب الكل

المصري باشا بشواربه اللي ما عرفوا الذل

ومصر فوق في الفراندة واسمها جولييت

ولما جيت بعد روميو بربع قرن بكيت

ومسحت دموعي في كمي ومن ساعتها وعيت

عــــلى اســــــم مــــصـــر

مصر السما الفزدقي وعصافير معدية

والقلة مملية ع الشباك .. مندية

والجد قاعد مربع يقرا في الجرنال

الكاتب المصري ذاته مندمج في مقال

ومصر قدامه اكتر كلمة مقرية قريتها

من قبل ما اكتب اسمي بإيديا

ورسمتها في الخيال على أبدع الأشكال

ونزلت أيام صبايا طفت كل مجال

زي المنادي وفؤادي يرتجف بجلال

صـــــــلاح جـــاهين

من بنـــــــــت البـــــــلــد

ولادك كبروا يا ريس

السلام عليكم ازيكم يا شباب عاملين اية ..ندخل علطول فى الموضوع عشان مطولش عليكم

وهنبدأ بــ


اقتباس:
وقال السفير سليمان عواد، المتحدث الرسمي باسم رئاسة الجمهورية، إن الرئيس استمع خلال الاجتماع الأول من رئيس الوزراء والوزراء المختصين عن أسباب مشكلة رغيف الخبز، وارتفاع أسعار السلع الأساسية، موضحا أن الرئيس شدد علي ضرورة أن يتاح رغيف الخبز للمواطنين، وأن تختفي ظاهرة الطوابير، متسائلا: إذا كانت المشكلة في الإنتاج، فلابد من زيادته.
دا كان جزء من الاجتماع اللى عقدة رئيس الجمهورية أمس ..وانا محبتش اجيب التعليق كلة ولكن انا اقتبست جزء منة نتكلم فية ونفصصة مع بعض كدا
زى الحلوين ..الرئيس مبارك شدد على ان يتاح رغيف الخبز للمواطنين .... طيب والله فيه الخير وحاسس بينا
ويشكر (الف شكر يا ريس) هو انا عندى استفسار بسيط ..........
هو مفيش مشكلة فى البلد بتتحل الا لما الريس يتدخل فى حلها ...... (اتارى الناس كانت خايفة لما طلعت الاشاعة بتاعت ان الريس مات ... ربنا يحفظة لينا بقى على كدا)
مشكلة البنت اللى كتبت موضوع التعبير وكانت هتتحرم من دخول الامتحانات لمدة سنتين
ومشكلة عصام الحضرى
ومشكلة الاعتصامات
ومشكلة فتح الحدود مع فلسطين (غزة)
ومشكلة الاشاعة اللى طلعت علية
ومشكلة ومشكلة ومشكلة واخرهم كانت مشكلة الحضرى لما قال (متزعلوش الحضرى ههههههه)والله الراجل دا محترم ايوة محترم واخد بالة من كل المجالات فى الدولة حتى الكورة
واضح انة راجل رياضى جدا وربنا يبارك فى عمرة يا رب واشوفة وهو عندة 100 سنة
المهم بقى نروح للجزء التانى مع الحوار اللى اان اقتبستة .......
إذا كانت المشكلة في الإنتاج، فلابد من زيادته

الف الف الف شكر يا ريس بس احنا هنزود الانتاج منين وهو احنا عندنا ومزودناش يعنى عشان نزود الانتاج فى الخبز يبقى لازم يكون فى قمح وبوفرة كمان بس يا ريس الكلام دا ايام ما كنا بنصدر قمح الوقتى احنا بنشحتة ولا اية......؟
وبعدين بس اقول حاجة بسيطة القمح دا بيجى ونفصل السنابل بتاعتة عن بعضها وبعد كدا نوديها الطاحونة
المهم نطحنة ونديلة علقة سخنة وبعدها يبقى دقيق والدقيق غلى يا ريس والله ...... اة والله غلى الدقيق دا كان بـ 1.25 (جنية وربع)
بقى يا ريس بــ 3.50 (3جنية ونص)
واضح انك متعرفش الاسعار يا ريس كويس بص انا هقلك خف شوية من زراعة المحاصيل اللى احنا مش بناكلها وكلة يبقى تمام ..يعنى قلل شوية من زراعة البرسيم احنا مش بناكلة احنا خلاص فهمنا الليلة ومعدناش بناكلة
كبرنا يعنى ههههههههههههه ولادك كبروا يا ريس ....... افرح بقى بس خلاص انا من قلعة مصرية يا ريس بقلك

الف شكر ليك على الخطوة الجميلة ويا ريت يا ريت بس تجيب ناس فى الوزارة بتفهم (ولا بلاش بتفهم دى) هات ناس تخاف علينا على ولادك محنا بردة ولادك يعنى انت عندك الوقتى 80مليون على الاتنين اللى عندك
فعشان كدا ربنا يعينك يوفقك وابقى شوف حكاية الزيت اللى غلى والعدس والفول والبيض والمكرونة
يعنى خد بالك منهم بلاش تستنى لما حد يضرب بالنار ولا لما الناس تولع فى بعضها ولا الناس تنتحر
والف شكر على حسن استماعك يا ريس موفق يا رب

ابنك ..................

مش هقلك اصل تعملها معايا

سلااام